Помнік князю Міндоўгу установяць у Наваградку - галоўнай княжацкай рэзідэнцыі. Міністэрства культуры Рэспублікі Беларусь аб'явіла конкурс на стварэнне эскізных праектаў помніка знакамітаму князю. Мэтай конкурсу з'яўляецца пошук найбольш выразнага вобраза легендарнага князя Міндоўга, асоба якога сімвалізуе глыбокія гістарычныя традыцыі існавання беларускай дзяржаўнасці. Міндоўг не проста знакаміты кязь, а заснавальнік і першы кіраўнік Вялікага княства Літоўскага. Менавіта Міндоўг аб'яднаў пад сваёй уладай літоўскія плямёны і беларускія княствы Навагрудак, Гародня, Ваўкавыск, Слонім. Пры гэтым месца ўсталявання будучага помніка выбрана невыпадкова. Дзейнасць Міндоўга цесна звязана з Навагрудкам. Гэты горад з'яўляўся палітычным цэнтрам, адной з галоўных рэзідэнцый князя. Дарэчы, аб неабходнасці стварэння помнікаў гістарычным асобам не аднойчы казаў скульптар Уладзімір Жбанаў. Уладзімір Іванавіч зазначаў, што пакуль справай збору грошай на такія помнікі не займецца Міністэрства культуры, наўрад ці варта чакаць поспеху. На жаль, знакаміты скульптар памёр раней, чым даведаўся аб тым, што яго прапанова пачута, піша Народная воля.